Jubanııazovtar – Almaty sýretshileriniń arasyndaǵy tanymal otbasy. Alǵash ret áýlettiń kásibı shyǵarmashylyq irgesin QR eńbek sińirgen mádenıet qaıratkeri, Sýretshiler odaǵynyń múshesi Qýandyq Naýryzbaıuly Jubanııazov (1947–2007) jáne onyń jubaıy dástúrli qoldanbaly óner ıesi, QR eńbek sińirgen mádenıet qaıratkeri Kúlıpa Esimqyzy qalady.
Is-sharanyń ashylý barysynda Elbasy kitaphanasy dırektorynyń orynbasary Kúlaısha Aqtaeva atalmysh kórmeniń «Qazaqstannyń ónerpaz áýletteri» atty jańa jobanyń bastaýy ekenin belgiledi.
Elimizde mádenı muramyzdy dáripteý jáne saqtaý, ónerpazdar áýletin qoldaý máseleleri ózekti bolyp otyr. Jubanııazovtar úıi bizdi Qazaqstan mádenıetiniń kezeńderine sáıkes oryndaǵan birqatar býyn jumystarymen qyzyqtyrdy. Olardyń shyǵarmashylyǵynda sándik-qoldanbaly óner men kórkem ónerdiń dástúrli tehnıkalary utymdy úılesedi. Kórmeniń maqtanyshy retinde ónerpazdar áýletin qalaǵan Qýandyq Jubanııazovtyń 80-90 jyldardaǵy jumystary usynylǵan. Kórmede kilem toqý óneriniń dástúrine adal Kúlıpa Jubanııazovanyń eń úzdik tús kilemderi de bar, - dedi Kúlaısha Qabdýalıqyzy.
Kúlıpa Esimqyzynyń shyǵarmashylyq mamandyqty tańdaýyna bul salada júrgen ata-anasy yqpal etken. Olar kıiz úı jabdyqtaryn óz qoldarymen jasaı bilgen halyq sheberleri, jıyp-tergen bilimi men tájirıbesin balalaryna bergen ustalar.
– Ata-anamyz bizge jún ıirý, kıiz tóseý, mata tigý sekildi ulttyq qolóner túrleriniń qyr-syryn jastaıymyzdan úıretýshi edi. Sol tárbıege degen alǵys retinde «Sheberler» tús kilemin olarǵa arnadym, - deıdi ol.
Shyǵarmashylyqpen aınalysatyn kez kelgen otbasynyń dástúrine aınalǵan mura sekildi, Jubanııazovtar áýletiniń balalary da ata-anasynyń ónerdegi isin jalǵastyrýda. Qyzy Gúlnar Jubanııazova – sýretshi, sándik-qoldanbaly óner sheberi, ónertaný magıstri, Qazaqstan sýretshiler Odaǵynyń múshesi, al uly Nursultan Jubanııazov – músinshi ári sýretshi, respýblıkalyq jáne sheteldik plastıka óneri kórmesiniń qatysýshysy.
– Jubaıym ekeýimiz Gúlnardyń biz tańdaǵan jolmen júrip, biz keshken qıyndyqtarǵa tap bolǵanyn qalamadyq. Ony Qyzdar pedagogıkalyq ınstıtýyna oqýǵa túsýge kóndirdik. Soǵan qaramastan, qyzymyz sýret salýmen aınalysty, Reseı, Fransııa elderinde ótken jas sýretshiler kórmelerine qatysyp, Qazaqstan sýretshiler odaǵynyń múshesi atandy. Aqyry ol Akademııaǵa oqýǵa túsip, ónertaný salasynyń mamanyna aınaldy.
Gúlnar Jubanııazovanyń aıtýynsha, ol úshin atalmysh kórmede «Meniń Qazaqstanym», «О́mir jalǵasy» atty anasynyń tús kilemderi men ákesiniń «Qymemshek taý» atty sýreti erekshe qymbat. Onyń baýyry Nursultannyń jumystary da qoǵam máseleleri týraly tereń oıǵa súńgitedi.
– «Adasqandar» atty Nursultannyń músini túrli dinı sektalarǵa kirip ketip, qazaq mádenıeti men dástúrlerimen baılanys úzgen adamdarǵa arnalǵan. Shyǵarmashylyqqa adal jandar óz jumystarynda halqyna tán tarıh pen mádenıetti beıneleıdi. Qazir biz Qazaqstan sýretshiler odaǵynyń uıymdastyrýymen ótetin «Alash» qozǵalysyna arnalǵan iri kórmege daıyndyq ústindemiz, - deıdi Gúlnar. Sýretshiniń sózinshe, onyń bes jasar qyzy Málıka da sýretshi bolǵysy keledi eken. Qazirdiń ózinde Málıka óz sýretterindegi qabyldaý erekshelikteri men mazmunnyń tereńdigimen jurtty tań qaldyrý ústinde.
Astana qalasy Sýretshiler odaǵynyń tóraǵasy Toqtar Ermekov shabyt syılaǵan kórmeniń uıymdastyrýshylaryna alǵysyn bildirdi:
– О́ner salasynyń grafıka, músin, kilem toqý óneri, beıneleý óneri ispetti bir-birine uqsamaıtyn túrleriniń bul kórmede ádemi úıleskeni meni tań qaldyrdy. Elimizde Jubanııazovtardaı ultymyzdyń sándik-qoldanbaly ónerin jalǵastyrýshy daryndy januıanyń baryna sheksiz qýanyshtymyn, - dedi ol.
Kórme 22 qazanǵa deıin jalǵasady.
